Zarma bibile

 SANNEY FAHAMANDIYA@O

Tiro wo ra boro ga hatta ka di sanni fooyaŋ kaŋ Zarma boobo si faham d’ey, wala i ga goy da sanni danga Zarmey mana doona ka goy d’a. Sanney wo, iboobo gonda * woone i jarga Irikoy Tira Hanna ra, amma afooyaŋ sinda. Neewo gonda sanney din fahamandiyaŋ.

absint: Safari fo no kaŋ ga te damari. A ga fottu gumo mo.

Adam-ize daa laalo: Daa no kaŋ i ga Adam-izey kulu hay d’a, kaŋ si ba ihanno teeyaŋ wala haŋ kaŋ Irikoy ga ba. A si ba kala nga boŋ ibaay. Alwaati kulu kaŋ iri go gaaham woone ra, daa wo si fun iri gaa, amma Irikoy Biya ga Almasihu ganako no dabari a ma hin a.

adilandi: Irikoy ga gomni goy te boro kaŋ ga Yesu Almasihu cimandi se. Almasihu buuyaŋo sabbay se, a ga bora din zunubey kaa a gaa ka Almasihu adilitara lasaabu bora se.

adilante: Boro no kaŋ Irikoy si taali kulu lasaabu a se, amma a na Yesu Almasihu adilitara lasaabu sanda bora din wane no. Zarmey si tara ka goy da «adilandi» wala «adilante». Haŋ kaŋ no, boro kaŋ mana du faaba si bay kaŋ Irikoy, kaŋ ga ti Adilitaraykoy, ga hin ka zunubikooney adilandi, ka goro Adilitaraykoy. Boro kulu si ciya adilante nda cimi, kala day Yesu Almasihu sabbo ra.

adilitaray: Haŋ kaŋ ga saba nda haŋ kaŋ Irikoy ne ga boori no. Fonda kaŋ ga kay Irikoy diyaŋ gaa no.

Agariba: Koyo Hirodus, bora kaŋ gonda Yahudiya laabo koytara Almasihu hayyaŋo waate, a hanga-si-ham fo maa Agariba. A laabo go Israyla laabo se azawa kambe haray.

Agustos: Roma laabey bonkooni fo maa no.

albasta: Tondi kwaaray fo no kaŋ i ga kolba kayna te d’a waddi ji wala turaare daŋyaŋ se.

alfaga: Irikoy Sanno ra alfaga ga ti kunda waani fo boro. Irikoy borey, sanda Israyla wala Yahudancey dumi no, i game ra boro kulu si te alfaga kala boro kaŋ i g’a asuli lasaabu ka ye Musa beero Haruna do. Irikoy no k’i suuban k’i daŋ i ma sargayyaŋ salle Irikoy windo ra, i ma te diina goy jama kulu se mo. Boro kulu si nga boŋ te alfaga – kala day boro kaŋ i hay kunda kaŋ Irikoy suuban din ra. (Guna Fattayaŋ tira 28:1, da Kabuyaŋ tira 16:40.)

alfaga beeri: Haruna kunda ra boro kaŋ ga ti arkusu alfagey kulu se no. Nga hinne no ga furo Nango kaŋ ga hanan gumo ra, Irikoy fuwo ra, soro folloŋ jiiri kulu, waato kaŋ a ga sasabandiyaŋ te jama zunubey se.

Almasihu: Faabakwa maa fo no. A feerijo ga ti «bora kaŋ i suuban ka donton», sanda bora kaŋ Irikoy suuban ka fay waani. I gond’a baaru za Alkawli Zeena tira ra, kaŋ ne a ga kaa. Gareku sanney ra i ga ne a se Kristi.

Almasihu marga: Borey kaŋ ga ti Almasihu ganakoy no. Nangu fooyaŋ tira wo ra i ga salaŋ da ikulu me-a-me za sintina ka koy hala Almasihu ye ka kaayaŋ alwaato. Amma nangu baayaŋ i ga ba ka ci kwaara fo marga kaŋ ga Almasihu gana. I ga margu ka Irikoy Sanno fonda dondon k’a gana, k’a dondonandi mo boro cindey se.

Almasihu yanjekaaro: Boro fo no kaŋ ga haw ka kaa ka borey daŋ i ma nga beerandi, manti Almasihu. Amma a si kaa kala Almasihu marga sambuyaŋo banda. (Guna Tassalonikey Hinkanta sura hinka da Yohanna Sintina sura hinka ka sintin da ayya 18 ka koy sura bananta.)

almug: Tuuri-nya fo no kaŋ a